ନୂଆଦିଲ୍ଲୀ: କେନ୍ଦ୍ରୀୟ ତଦନ୍ତକାରୀ ସଂସ୍ଥାଗୁଡ଼ିକର ଅପବ୍ୟବହାର ଅଭିଯୋଗ ଆଣି ଆମ ଆଦମୀ ପାର୍ଟି ପୁଣି ଥରେ ବିଜେପି ସରକାରଙ୍କୁ ଟାର୍ଗେଟ କରିଛି। ବରିଷ୍ଠ ଆପ ନେତା ଏବଂ ଦିଲ୍ଲୀ ବିଧାନସଭାରେ ବିରୋଧୀ ଦଳ ନେତା ଆତିଶୀ କହିଛନ୍ତି ଯେ, ଗୁଜରାଟ ଉପନିର୍ବାଚନରେ ଆପର ବିଜୟକୁ ନେଇ ବିଜେପି ଭୟଭୀତ । ତେଣୁ ବିଜେପି ଇଡି-ସିବିଆଇ ଦ୍ବାରା ମିଥ୍ୟା ମାମଲା ରୁଜୁ କରିବା ଆରମ୍ଭ କରିଛି ବୋଲି ଆତିଶୀ ଅଭିଯୋଗ କରିଛନ୍ତି । 

ଆତିଶୀ କହିଛନ୍ତି ଯେ, ଆପ୍‌ ନେତାମାନେ ଏଥିରେ ଭୟଭୀତ ହେବେ ନାହିଁ । ଗୁଜରାଟରେ ଆମ ଆଦମୀ ପାର୍ଟି ପୂର୍ଣ୍ଣ ଶକ୍ତି ସହିତ ନିର୍ବାଚନ ଲଢ଼ିବ। ଶୁକ୍ରବାର ଦିନ ଦଳୀୟ ମୁଖ୍ୟାଳୟରେ ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇ ଆତିଶୀ ଅଭିଯୋଗ କରିଛନ୍ତି ଯେ, ବିଜେପି ସରକାର ପୁଣି ଥରେ ଏହାର କେନ୍ଦ୍ରୀୟ ତଦନ୍ତକାରୀ ସଂସ୍ଥାଗୁଡ଼ିକର ଅପବ୍ୟବହାର ଆରମ୍ଭ କରିଛି। ମିଥ୍ୟା ମାମଲାଗୁଡ଼ିକର ସିରିଜ୍ ପୁଣି ଥରେ ଆରମ୍ଭ ହୋଇଛି । ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଏବଂ କେନ୍ଦ୍ରୀୟ ତଦନ୍ତ ବ୍ୟୁରୋ (CBI)ର ଅପବ୍ୟବହାର ଉପରେ ସୁପ୍ରିମକୋର୍ଟ ଏକ କଡ଼ା ମନ୍ତବ୍ୟ ଦେଇଥିଲେ ଯେ, ଏହି ସଂସ୍ଥାଗୁଡ଼ିକ ସ୍ୱାଧୀନ ନୁହଁନ୍ତି। ସେମାନଙ୍କୁ ମନ୍ଦ ଉଦ୍ଦେଶ୍ୟରେ ବ୍ୟବହାର କରାଯାଉଛି । ଏହି ଅଭ୍ୟାସ ପୁଣି ଥରେ ଆରମ୍ଭ ହୋଇଛି ବୋଲି ଆତିଶୀ କହିଛନ୍ତି । 

ଆତିଶୀ କହିଛନ୍ତି ଯେ, ବିସାବାଦର ଉପନିର୍ବାଚନରେ ବିଜେପି ଆପକୁ ପରାସ୍ତ କରିବା ପାଇଁ ଯଥାସମ୍ଭବ ପ୍ରୟାସ କରିଥିଲା। ପ୍ରଚୁର ଟଙ୍କା ଖର୍ଚ୍ଚ ହୋଇଥିଲା, ପୋଲିସ ସୁରକ୍ଷାରେ ମଦ ବଣ୍ଟନ ହୋଇଥିଲା । ଆପ କର୍ମୀମାନଙ୍କୁ ଭୟଭୀତ କରାଯାଇଥିଲା । ସେମାନଙ୍କ ସହିତ ଡିଲ୍ କରିବାକୁ ଚେଷ୍ଟା କରାଯାଇଥିଲା । ସମଗ୍ର ପ୍ରଶାସନର ଅପବ୍ୟବହାର କରାଯାଇଥିଲା । ତଥାପି, ଆପ ଗୁଜୁରାଟରେ ଏହି ଉପନିର୍ବାଚନରେ ବିପୁଳ ବ୍ୟବଧାନରେ ଜିତିଛି । ଗୋପାଳ ଇଟାଲିଆଙ୍କ ଏହି ବିଜୟ ପରେ, ଆପର ଗ୍ରାଫ ଗୁଜୁରାଟରେ ଦ୍ରୁତ ଗତିରେ ବୃଦ୍ଧି ପାଉଛି ।